2025-26英超球季啱啱煞科，除咗阿仙奴打破宿命封王之外，全球超過1100萬球迷參與嘅 FPL（Fantasy Premier League）亦都迎來大結局！今季嘅世界冠軍竟然係一個「新丁」——23歲嘅丹麥醫科生艾歷伊遜（Erik Ibsen）。最令人震驚嘅係，喺現今個個玩家都靠 AI 大數據計分排陣嘅年代，佢竟然拒絕隨波逐流，單靠自己整嘅 Excel 表「手動計數」，最終以38分嘅優勢拋離對手，成功登頂！
拒絕AI大數據 靠自家Excel「土炮」封王
近年 FPL 競爭極度激烈，唔少玩家甚至內容創作者都會利用 AI 工具去預測球員得分、分析賽程同排陣。不過，伊遜就對 AI 嗤之以鼻。佢認為 AI 預測往往忽略咗實際比賽嘅戰意同特殊情況。
親自落場計數 每日「課肝」四五個鐘
伊遜接受訪問時霸氣咁話：「大家可以睇返我頭幾個星期嘅排陣，就知我絕對冇用 AI。我試過揀達高斯基（James Tarkowski）、古希（Marc Guehi）甚至拉耶（David Raya）做隊長，呢啲絕對唔係正常 AI 會畀出嚟嘅建議。」佢透露自己全靠一個極度複雜嘅 Excel 表去分析數據：「煞科戰前嗰個星期，我每日對住個 Excel 表四五個鐘。我三個星期後就有考試，但我到而家都未開始溫書！」
爆冷隊長人選 盡顯獨門眼光
伊遜之所以能夠喺1100萬人之中脫穎而出，全靠佢獨到嘅眼光同敢於冒險嘅膽識。佢批評 AI 預測太過死板：「例如煞科戰，曼城同阿仙奴嘅球員依然被 AI 評為最高分嘅買入對象，但其實有啲球隊已經無欲無求，戰意成疑，我對呢啲 AI 數據非常有保留。」
般奴費南迪斯成奪冠最後拼圖
帶住21分優勢進入煞科日（Gameweek 38），伊遜並冇保守行事，反而將隊長臂章交畀曼聯嘅般奴費南迪斯（Bruno Fernandes）。結果 B費 不負所託，單場狂擸14分（隊長雙倍計即係28分），幫伊遜將領先優勢擴大到38分，毫無懸念咁贏走今屆 FPL 世界冠軍。
贏大獎兼圓夢 拖肥迷終可朝聖
贏得 FPL 世界冠軍嘅獎品非常豐富，包括一個7日嘅英國豪華之旅，以及來季兩場英超賽事嘅 VIP 門票。作為一個忠實嘅愛華頓球迷，伊遜最期待嘅就係可以親身飛去利物浦朝聖。
期待見證愛華頓新主場
「我從來未現場睇過英超比賽，由零開始突然可以坐 VIP 靚位睇波，呢個經歷一定好特別。」伊遜興奮咁表示，佢已經計劃好要去愛華頓嘅新主場（Hill Dickinson Stadium）睇波，實現由細到大嘅夢想。
給FPL新手的忠告：保持耐性
由最初只係為咗幫家姐玩公司 League，到最後因為「姊弟競爭」自己開隊玩，伊遜首季玩 FPL 就已經爆機。對於下季準備再戰或者新加入嘅玩家，呢位出爐世界冠軍有咩貼士？
「對於想贏嘅新手，最重要係保持耐性；對於純粹想玩下嘅人，最緊要係享受過程。我今季都經歷過好多個『爛 Week』，但最後我都贏咗。千萬唔好畀一兩個星期嘅差劣成績，定義你成個賽季。」
